1 Thessaloniciens
Maktubu dɨ ka dwar̰ɨ
Tesalonik i ciri mɨn dɨ geche dɨ mana gɨ wama gɨ Maseduwannə sumdɨ. Nare nə dam Tesalonik da, nan̰ i nare nə Gɨrek, me Juwib kaw ilə me ca. Paja gɨnə Jesu duwa|paja gɨ Pol day gɨ nə woni hára gandɨw nə Silas day gɨ Timote waygɨ nare Nõ dɨ lade dɨnə Jesu Kris duwa lə pii me, nare nan̰ kal dusɨrəgɨ Jesu dɨwə. Nare nan̰ dwar̰agɨ lə da, i nare nə gɨndəgɨ i Juwib bədə. Me nare nə Juwib nə gɨn̰ dwaya gɨ gɨlə gɨnə Pol duwa bam ilə me ca. Cendi so gandɨw gɨ gwale mwom da, nə Pol di sogɨ hargɨ kal Tesalonik di bam.
Àl aliya sɨr mwom da, Pol giy Timote ba hana dwaynaw gwale gɨnə kretiye nə Tesalonik day (chapitɨr 3). Cwara duwa lə da, an̰ji wayɨw Pol da, cendi ba ɗɨbɨ ilə dusi day dɨ kala Mãr̰ĩyə di jang sɨn̰ me, an̰ji cɨmɨw gwale day gɨ cendi ùrɨw di daa me ca. I dara ta di me Pol jangɨ gɨ maktubu dɨ ta di. An̰ji àlɨw Mãr̰ĩ dóche dara dusi dɨ kala dɨnnə nare nə Tesalonik day me dwani day dɨ cendi àl me ca (chapitɨr 1-3). An̰ji gɨsɨgɨ me, waygɨ dara cwara gɨnə Jesu Kris duwa di, ba ha ꞌya i man mo, me nare woni kala dusɨrəgɨ dɨwə nə mare me nə dam bɨ̀ra me da, an̰ji ba ha àlagɨ̀ i man mo. Yande da, Pol waygɨ gwale gaba hɨlalagɨ dusɨrəgɨ, ba gɨ ha hára pad dama gɨ Aba ciri gɨ Jesu Kris alə daa mɨn (chapitɨr 4-5).
2 Thessaloniciens
Maktubu dɨ ka dwar̰ɨ
Mana gɨ maktubu dɨ ka lə da, paja gɨnə Jesu duwa|paja gɨ Pol way ɗang dara cwara gɨnə Jesu Kris duwa. Gwale gɨ ta di wor ilə kɨdəgɨ kretiye nə Tesalonik dɨrəgɨ lə sɨn̰. Nare nə yab dwar̰agɨ lə ɨrɨm day, Jesu ba cwara gɨra ɗɨm, nə mɨn ɨrɨm day ba wála gɨ ta di ba i ib ɗɨm, i dara ta di me cendi gɨn̰ àla gɨ giyə bam me, dam ɓedɨ gɨ kwandagɨ ba ɨsɨnəgɨ cendi.
Pol jangɨgɨ maktubu dɨ ka di dara kal cendi ba kɨlangɨna ɨrmə day di bam, ba àlna giyə dara ꞌywaa gɨ mani ɨsə gɨ sɨdəgɨ, me ba àlna ladni me ca. Ɗang da, an̰ji ùr ba hurəgɨ abnani dusɨrəgɨ lə waygɨ dara wála gɨ nare ba gɨlnəgɨ dɨrəgɨ kaw, cendi ba yɨnə sɨdəgɨ wayna le bɨrmə gɨnə Mãr̰ĩyə.
